مسرحية ميس الريم

 

حركة الشبيبة الأرثوذكسية

     مركز طرابلس                                         أسرة الطفولة

      فرع الميناء                                         فوج النبي الياس

 

                                  مسرحية ميس الريم

 

1- المقدمة الموسيقية :

2- كحلون :

الحراس مع زيون (الحديث مغنى مع موسيقى)

الحراس : أهلا وسهلا فيكِ ببلدنا ميس الريم

           منقدملك حالنا حراس ميس الريم

           إسمك، شغلك، وضيعتك

          وشو منقدر نخدمك (ببلدنا 2) ميس الريم

زيون : أنا إسمي زيون، عندي بالمدينة محل بيع صحون وستي من ضيعة كحلون. (كحلون يا ضيعة ستي البعيدة / كحلون2) مطرح يللي بيبكي وبيحفر الحسون إسمو على خيال الحور بكحلون.

الحراس : أهلا وسهلا فيك ببلدنا ميس الريم

             وشو منقدر نخدمك ببلدنا ميس الريم

زيون : يا حراس لو بتساعدوني

        يا حراس رح يستعوقوني

       عرس بنت خالتي الليلة من عشية

الحراس : ها ها ها

زيون : تعطلت سيارتي ورح يخافو عليّ

الحراس : له له له له ….

زيون : وفستان العروس معي بالسيارة والعرس بكحلون وينك يا كحلون أن بدي فيها قبل الليل كون.

 

 

3- يا زيون يلي ستا من كحلون :

الشايوش : يا زيون يللي ستا من كحلون ببلدنا ميس الريم في مكنسيان اسمو نعمان لكنه

             تزاعل مع خطيبته صفقها كف صفقته كف بس ساءبت كفها رن أكثر … حرد

             … بطل الشغل وسكر الكراج.

زيون : وليش البلد مسكّرة.

الحرس : عنا بيفتحوا قبل الظهر وبيسكروا بعد الظهر وبيخانق بعضٌ.

زيون : ما في مين يصالح ؟

الشاويش : بلدنا مقسومة ناس مع أم العريس وناس مع أم العروس.

زيون : وانتو مع مين ؟

الحراس : مع الشاويش (يضحك الشاويش)

زيون : إيه دلوني على بيت نعمان، وأنا بروح بقنعو

الشاويش : إيه

الحراس : مندلا … ما مندلا … لأ ما مندلا … ما مندلا. 

الشاويش : خلص بس خلص مندلا على عمتو وعمتو بتدلا.

الشاويش : شوفي، بتروحي شمال يمين شمال يمين… (يختفي الحراس).

 

يدخل النسناس  4- أنا بدّلك عمة نعمان

النسناس : أنا بدلك على عمة نعمان.

زيون : أنت مين

النسناس : أنا بقولولي النسناس وبيتي الساحة

زيون : إيه خدني لعندها

النسناس : هي بتجي هي بتجي، تعي يا عمة نعمان

زيون : عيّط بعد بركي ما سمعت

النسناس : بتسمع … بتسمع صاليه متل الحية

وناطرة الحكي … المشكل بيجيبها من سفر سنة.

 

5- وجهك غريب علي .

تلجة : مين عيطلي … وجهك غريب علي

زيون : وأنا غريبة.

تلجة : بدك تقولي شي.

زيون : بدي تدليني على إبن خيّك نعمان.

تلجة : ما منصالح

زيون : بدي صلح سيارتي

تلجة : باعتتك شهيدة.

زيون : مينا هي شهيدة.

تلجة : ولو بدّك تقوليلي ما بتعرفيها … نهبتو لأبن خييّ.

زيون : ووينك إنتي عنو؟

تلجة : أنا يا حسرتي عليّ .. ليش أنا طالع بإيدي شي ، بس وينك ما خليت ولا بصّارة إلا تفسختلن الخطبة.

زيون : فاذن ليش زعلانين انبسطوا !

تلجة : نحنا زعلانين .. نحنا معيدين أنا تلجة عمة نعمان أخت المعلم راجي.

        هي مين بنت خاتم بو شهيدة. هه.

زيون : هلّق حاتم بو شهيدة بيّا ؟

تلجة : إيه بتعرفي

زيون : لأ

تلجة : حسّبت

زيون : إيه منيح يلّي ما علقتو هالعلقة. ولو ما انتو فسختو هالخطبة كنت أنا جايي افسخلكن ياها.

تلجة : ولك يسلّم هالتمّ شو كنت بدك تقولي.

زيون : بدي نعمان يصلحلي السيارة.

تلجة : يي، يا حسرتي على نعمان ليش شهيدة خلّت براسه عقل، بطل يعرف كلب البطارية من كلب الجعاريّ.

زيون : ولك يا تلجة إذا صلحتيلي عربيتي وما بكون زيون إذا ما حكيتلو كلمتين بس

تلجة : بيولعوا مشكل؟

زيون : إيه ولخلي الشوارب تطير مثل ريش التكاية.

تلجة : ولك تقبريني من وين الله بعتك.

زيون : ورح دبرلو عروس من ضيعة ستي كحلون

تلجة : مازال هيك رح دلك … بس ليكي أوعي تنسي المشكل.

النسناس : إنت ما تروحي هلّق صار وقتو.

             هو بيجي بيمرق تحت شباكها.

             وهي بتجي تمرق تحت شباكه بس ما بتحاكو.

(موسيقى)

 

6- تبقى تجي من الريح : (مع موسيقى)

نعمان : تبقى تجي بهالوقت وتقعد تخبرني حكايات خبيها بقلبي وربيها وعالباب تنطرني.

شهيدة : أنا شهيدة الشهيدة (2) شهيدة الحب شهيدة البغض شهيدة نعمان (يللي ما إللو أمان3) أمان أمان.

نعمان : يا هالصبي توّجع ، اللي راح ما بقى يرجع.

شهيدة : قلبو قسي وشو قال … قال وين صرتو الظاهر تغيرتو وتغير المرسال

زيون : مين قال ؟

نعمان : قالولي

زيون : إسألها

نعمان : أنا اسأل … سامع عن لسانها حكي قال خبروا نعمان

شهيدة : بينسى الهوا اللي كان … ضيعان إيامي معو ضيعان

نعمان : يا هالغريبة خبّريني منين بيقطفوا النسيان

زيون : أنا زيون الغريبة ما بحب النسيان. أنا بحب الحب وبحب الزمان يمرق ونحنا نحب.

           (تنتهي الموسيقى)

 

7- التحدي :

تأتي كل الناس (أهل العروس وأهل العريس)

نعمان : كاسكم

الناس : كاسكم

زيون : نعمان صلحلي وأنا بصالحكن

نعمان : هي أمها قوية

زيون : وشو يعني ؟

شهيدة : وهوي بتديروا عمته

نعمان : ما حدا يجيب سيرة عمتي ها.

زيون : ولك بس.

النسناس: ولك حلشي

زيون : ييه

نعمان : آه شعري (موسيقى ثم تنتهي بسرعة)

حاتم : ولا نعمان عشرين سنة بيَّك وزلمو ما طلعو معي راس هلق بدكن تطلعو راس أنا جايي ربيكن.

راجي : شو عم يقول بدو يربينا ونحنا على إيد المرجلة ربينا…

 

8- اشهدي يا ساحة ميس الريم : (مع موسيقى) (حوار بين حاتم وراجي)

الناس : اشهدي يا ساحة ميس الريم الليلة بدو يصير فكّ رقاب.

           اشهدي يا ساحة ميس الريم (2) بدو يصير نتف شوارب.

راجي : وسحب سيوف

الناس : ورجال تعبي الزوايا

إم نعمان : وضرب كفوف

الناس : اشهدي يا ساحة ميس الريم(2)

راجي : يا أبو شهيدة اسمعوا انتو تعديتو  اسكتنا   حكيتو  تسهلنا تحديتوا وصار ما صار

          خايف من هبوب النار.

إم نعمان : وما يضلّ فيكن حدا يرجع على بيتو

حاتم : نحنا

راجي : نعم انتو

حاتم : لا دارنا انزلت يوم العدا

إم شهيدة : سمعتوا

حاتم : ولا سيوفنا كلّت

راجي : عالسكت يا شايب يا صغير يا خايب

إم شهيدة : فكسنا الخطبة وابنك على القهر دايب

تلجة : نعمان مشي معي تقلّك بنت القمر والشمس نعمان لجبلك

راجي : نحنا صغار وبعيون الأعادي كبار انتو خشب حور ونحنا للخشب منشار (2)

إم نعمان : يا ملعب الريم يا ساحات ميس الريم انتي شهدي وخبري بيناتنا شو صار.

العسكر : شو هيدا (2) عيب (3) انتو (3) ضلّو متل ما انتو

الشاويش : سجّلوا بالدفاتر ايدوا بالمحاضر واكتبولي أساميهن

إم شهيدة  : مش نحنا يللي بدينا المشكل

إم نعمان : ولا نحنا بدينا المشكل

العسكر : فإذاً مين مين مين ؟

حاتم : البنت يللي إسمها زيون يللي ستا من كحلون

الشاويش : زيون اكمشوا زيون

 

 

9- اسمحولنا يا اخوان :

الشاويش: تعي تعي تعي لوين هربتِ.

زيون : عم إتمشى هون

النسناس : سيدنا أنا من أول ما شفتا هون عم تتمشى هيك متل السواح قلت الله يسترنا.

زيون : ليه شوفي ؟

الشاويش : قاتلتيون ببعضن وما بتعرفي شو في؟

              ياجماعة هيدي هيّ.

الناس : هيّ.

راجي : هيدي هي أصل المشكل .

الشاويش : ها شفتي.

زيون : أنا شفتن مزاعلين قلت بصالحن تيصلحولي هالعربية

راجي : ولك يا عمي في مشكل في ناس هاجمة عناس

الشاويش : إيه مظبوط ومازال في مشكل في سبب وفي مسبب مين المسبب

الناس : زيون

الشاويش : علقتي علقتي … قاتلتيون وخالفتيون وكلون شهدوا ضدّك

زيون : مش مظبوط في غلط

الشاويش : غلط شو؟

زيون : مين المحقوق؟

أهل شهيدة : انتي.

زيون : ييه مين المحقوق؟

اهل نعمان : انتي.

زيون : فإذاً انتو مش مقاتلين انتو متفقين

تلجة : متقاتلين ورح نتدابح

زيون : في لخبطة بالحكي في حدا عم يغلط

الحراس : مين عم يغلط

زيون : انتو عم بتقولوا الأهالي مختلفين

الحراس : إيه مظبوط

زيون : والأهالي متفقين على أنو انا سبب المشكل

الناس : إيه نعم

زيون : فإذن يا حراس الأهالي متفقين وإذا هن متفقين بتكونوا غلطانين وإذا انتو مشّ غلطانين بكونوا هن مش متفقين وإذا كانوا مش متفقين بكون أنا مش سبب المشكل؟

الحراس : كيف كيف لخبطينا إذا هنّ…..

             ثم يعيدها الناس

الحراس : خلص خلص صار لازم نحقق

حاتم : مازال ما تضاربنا لشو التحقيق ؟

راجي : إيه مظبوط منتضارب بالأول بعدين التحقيق

زيون : يا شويش اسألوا الأكترية يمكن أفضل تتأجل الخناقة لبكرا بيكونوا

         الأهالي ارتاحوا.

الشاويش : الخناقة بكرا وبكرا يلي بدو يخانق بيجيب معو عصاية سنديان، الزعرور ما بيسوا، البعكور ممنوع وبيجيب معه تذكرة الهوية.

شهيدة : كلنا بدنا نخانق.

حارس : أيدلي إسمي من هلق.

الشاويش : عفاك.

حاتم : إيه إذا مضيت الليلة عسلامة.

راجي : ما رح تمضي إسألني إلي.

ثم يرجعوا ويتقاتلوا

 

10- أغنية لفيروز (سألتك حبيبي)

1- إذا هني متفقين:

النسناس : إذا هني متفقين بتكونوا غلطانين. يا لطيف الأدب العربي شو عويص.

زيون : بلشت تروق البلد.

النسناس : بتروق بتروق هلق كل واحد بيعلق مع مرتو وما بيعودو فاضيين لحدا.

زيون : أول ما شفتني عرفتني عن حالك، بيتك الساحة رح تسمحلي الليلة قاسمك ببيتك، غريبة وغريب إجتمعوا.

النسناس : ولوّ بيت الضيق بيساع ألف صديق كيف لو كان البيت ساحة. أنا من هون لهون وانت من هون لهون أوسع من قصر الأمير وسقفنا عالي.

 

2- كانت مثل هلق :

نعمان : كانت متل هلق تفتح الشباك وتسهرني

شهيدة : كان متل هلق يفتح الشباك ويسهرني.

نعمان : عمروا بيناتنا حيطان

شهيدة : الغيم طفى النجمة

نعمان : دبلت الوردة بالمزهرية

شهيدة : ردلي محبس الخطبة

نعمان : بغنيلك وهالليل بغني معي. وبتخايلك فوق الدرج عم تسمعي ومرات بكتب

          دمع عالحيط العتيق بركي يا أيام العتيقة بترجعي.

شهيدة : لا أنا ولا أنت عدنا راضيين اتنيناتنا الظاهر علينا مغيرين هوي الحكي هوي

           التعب هو الزمان ما عاد هلق فيك تعرف ذنب مين.

النسناس : تفضلي روبصوا الله وكيلك بلا عرق وهيك. كاسكم.

(موسيقى دخول العسكر)

 

4- أغنية آخر إيام الصيفية :

 

5- ويا غندور :

حاتم : يا غندور بدي راجي بو نعمان ينهان بالساحة ينهان.

       لازم ياكل قتلة وما بيقدر يستحصل ع Rapport.

غندور : هيدي شغلة بتكلف.

حاتم : وتكلف وبدي توقعلوا الطربوش.

غندور : توقيع الطربوش هيدا إكسترا

حاتم : مندفع اكسترا

غندور : فإذاً إتفقنا

حاتم : مين بعتك مين دفعك مين دفعلك!

غندور : ما حدا بيعرف طمن بالك هيدي مصلحتنا  ش ش ش

راجي : هودي شو هلي لابسن

أو حلقة : هودي كفوف الBox هاي هاي

راجي : يا بو حلقة حاتم بو شهيدة قلّل إحترام اليوم وأنا بتعرفني ما بحب الأذى دبرلي ياه

         بمعرفتك

أبو حلقة : فهمت عليك

راجي : على قد القتلة بتكون الدفعة

أبو حلقة : شو رأيك بشي بوكسين يخلوّ وجه أزرق.

راجي : يا بو حلقة فهام علي، بدي دبر لحاتم شي قتلة فولكلورية.

أبو حلقة: رح دبرلك عصاية تكسر كسر.

راجي : ما تنسى الطربوش، مين بعتك مين دفعك مين دفعلك ….

أبو حلقة : ما حدا بيعرف طمن بالك هيدي مصلحتنا.

راجي وأبو حلقة : مين بعتك مين دفعك…..

راجي : شوف شغلك

أبو حلقة : بتأمر أمر

 

6- نعم يا معلم راجي :

راجي : تفضلي لعنّا

زيون : هون أريح لا عندك ولا عند حاتم هيك على الحياد

راجي : أي حياد ما أنت اللي حرّكت المشاكل

زيون : أختك تلجي حمستني ضدّن أنا بس شفت شهيدة لقيتها حلوة

راجي : كيف بدها تكون حلوة وبيّها حاتم

زيون : ايه شو دخل بيّا، ابنك بحبها

راجي : حبّه الحب، بقّلي بالي اعملو شي فلّق بركي بيصحا.

زيون : إبنك انسان بحب بلدكن هيك بتعمل بيلي بحب

راجي : ولك يا عمي بطّل شغلو وقال ما بقا بدّو ياها بس كذاب أنا بعرف العشاق أخ لو فيّ أنقل هالبيت لشي مطرح تأخلص من حاتم وبنتو.

زيون : ليش الحب يا معلم أرض وبيت تتنقل منه وتبعد نحنا منهرب وهو بيلحنا

راجي : طيب قولي لي شو لازم اعمل تخلصوا منها

زيون : جوزوا ياها

راجي : هيدا مش رح بيصير (2) أبداً.

7- أغنية لفيروز : حبّو بعضن

 

8- أبو حلقة وغندور

غندور : أهلا وسهلا بأبو حلقة

أبو حلقة : أهلا فيك

غندور : لوين ؟

غندور : أنا قاصدك.

أبو حلقة : خير.

غندور : إجانا قتلة لواحد محرز

أبو حلقة : بشرفك الظاهر الشغل بيجي مع بعضه وأنا اليوم رسي عليّ تعهد قتلة لواحد

             قدّ نص البلد

غندور : ليكونو ما غيرن اللي اختلفو اليوم ؟

أبو حلقة : هو هني في غيرن راجي وحاتم، حاتم وراجي

غندور : بس خواجات بكاسروا بالسعر ولا بكلفوك تقوص عحدا

تنتفو كمان

أبو حلقة : ومنشكر الله لا عم ننهب ولا عم نسرق كله بتعبنا وضميرنا مرتاح

غندور : أبداً ولو

أبو حلقة : وشو رأيك يا أستاذ نوقتلٌ ياها اتنينون سوا هون بنص الساحة.

غندور : فكرة، بس ليك يا ابو حلقة الله يرضى عليك ما بدنا نضارب على بعضنا بالسعر أبداً ها.

ابو حلقة : شو تسعيرة النقابة منمشي

غندور : يا عيني عليك

ابو حلقة : ومين بعتك مين دفعك مين دفعلك

غندور + ابو حلقة : ما حدا بيعرف طمّن بالك هيدي مصلحتنا

(تزمر زيون)

ابو حلقة : شو هيدا ؟

غندور : شو هالتزمير ؟

الشاويش : زيون.

الشاويش : ما إلنا شغلة غيرك ؟ زيون لشو التزمير بها الليل ؟

زيون : عم بندهلك

الشاويش : انت الأذى فيك طبع بدل ما تقلقي الناس بالزمور اندهي صوت وأنا بسمع يا ….. حراس  يا ….. دورية (ثم يسمع صوت) لبيك ويدخل الحراس. ها شفتي

زيون : بدّي انت تشوف يا محلا الزمور

الشاويش : وهلق شو بدك

زيون : بدي توقفلي هالجوز

ابو حلقة + غندور : ييه، نحنا

زيون : سيدنا بدّن يضربوا حاتم وراجي بكرا وتعلق البلد ببعضها

الشاويش : انتو إلكن سوابق تفضلو عالمخفر

الحراس : ايه تفضلوا

الشاويش : انت بضّلك هون لأنك الشاهد الوحيد

 

9- غنية : (كنا نتلاقى)

 

10- لشو بعتو ورايي

راجي : لشو بعتو ورايي؟

الشاويش : اعترفو ابو حلقة وغندور

راجي : مامعي خبر بشي

حاتم : له يا آدمي عم تنكر

تلجة : انا قلتلو لخيي تيتشكا لمختار المخاتير

الشاويش : ولك انت رح ضللي ورا خيّك تتخربيلو بيتو ، مش عارفة انو اذا وصلت القصة لمختار المخاتير لا بتكونوا لا انتو ولا هن مبسوطين ؟

تلجة : وشو رح يصير يعني يا بيحكمنا يا بيحكمون

الشاويش : الله يستركن ما يطلعلكن بشي شغلي لا عالبال ولا عالخاطر اصطفلوا

 

11- عبكرا بكير (مع لحن)

راجي : يا ريتا ما كانت دربك ياكحلون تمرق من بلدنا  ولا عرفنا زيون

حاتم : ولا شفنا زيون

الشاويش : ما دام القصة عم تكبر انا بدي ارفعها لمختار المخاتير

الشاويش : انت زيون

زيون : نعم

الشاويش : بما إنك شاهد

زيون : نعم

الشاويش : رح تحضري قبل الكل

زيون : نعم نعم نعم نعم

 راجي : عبكرا بكير

حاتم : عبكرا بكير

راجي وحاتم : ورح يحكم بيناتنا مختار المخاتير

الناس : (عبكرا بكير (2) رح يحكم بيناتنا مختار المخاتير (2)

 

 

1- المقدمة الثانية : (موسيقى)

     2- مختار المخاتير :

(مع لحن) مختار المخاتير اللي حكمه بيمتد من الساحل للجرد جمع الأعضاء الإختياريي.

ودرسوا قضيتكن.

المنادي : الشيخ دياب رستم سعيفان مختار الدوارة.

(بنت وشاب) : أهلا وسهلا بالشيخ دياب، يللي بيطلع من غير اهتمام

المنادي : اخونا وحبيبنا، الشيخ فضول مرهج بو قنديل مختار الشميسي، ختير وما منقبل غيرو.

-أهلا وسهلا بالشيخ فضول شو هالطلة يسلم هالطول، بدك تبقى نايب عطول.

المنادي : الشيخ سرحال جهجه بو رحال مختار القاطع.

-أهلا وسهلا بالشيخ سرحال يللي بألف ميّة رجال بدّو هدية منا تمثال

المنادي : كبيرنا وعظيمنا، الشيخ لقيس الغضبان مختار العالي، مرتو صبية، وتجوز من يومين، هيدي سابع مرة.

– أهلا وسهلا بالشيخ لقيس يللي بيوصل دايما لقيس عمرك مية وبعدك تلبيس شرفتوا شرفتونا عرفناكن ما عرفتونا ةانشاء الله توصل بكير يا مختار المخاتير /تييير (زيون).

 

بلا لحن

– ولك يا عمي خلّي يفوت الشيخ لقيس

– وينك يا شيخ لقيس

– الشيخ هو وجايي توفى عالطريق

– له

– البقية بحياتك

(موسيقى)

مع لحن

– مختار المخاتير أهلا وسهلا مختار المخاتير يللي بيشيل الزير من البير

 

 

بلا لحن

مختار المخاتير : يا أهل ميس الريم إلكن عندي عطف خاص قصة بريق الزيت منعرفها،

                 راجي وحاتم اختلفو وتشكو عبعضن غندور وأبو حلقة اخذنا إفادتن

                ووقفناهن، مين شهودك يا راجي ؟

راجي : زيون

مختار المخاتير : مين شهودك يا حاتم ؟

حاتم : زيون

مختار المخاتير : زيون اللي ستها من كحلون عرفتك وبعرف ستك إنت وراجي وحاتم (يا

                  بيي مللا ثلاثة) (2)

زيون : أنا طالعة لعند ستي وكمان عرس بنت خالتي وتعطلت سيارتي بميس الريم

مختار المخاتير : وتأخرت ولمكانيسيين نعمان حردان ما صلحلك السيارة خربطت البلد،

            إنت متل ستك مشكلجية

 

3- غنية يا مختار الخاتير :

 

4- حوار زيون ومختار المخاتير

راجي : يا سيدنا نحنا معنا الحق

مختار المخاتير : ييه بعدك يا راجي مْلَقطلي بالحق تعيش وتاخد عمرو وين بعد في حق، الله يرحمه.

مختار المخاتير : قللي بتريدوا تتصالحوا

راجي : مثل ما بتريد

مختار المخاتير : ومين يللي بيبدى بالصلح

أهل العريس : هني

مختار المخاتير : يا أهل العروس بتريدوا تعتذروا

أهل العروس : لا

مختار المخاتير : يا أهل العريس بتريدو تعتذروا

أهل العريس : لا

مختار المخاتير : طيب إعتذر إنت يا نعمان لشهيدة

تلجة : أوعا ولا ها بقصف عمرك

نعمان : سيدنا سبتلي عمتي

مختار المخاتير : تتسبلك ياها شهيدة أحلى ما يسبوها الغرب

شهيدة : إيه فهموا فهموا

مختار المخاتير : عمرو ما يفهم بكرا بيندم

نعمان : اندم

تلجة : إيه

مختار المخاتير : شو يعني خلص تقاتلتو

تلجة : تقاتلنا

مختار المخاتير : والعريس والعروس

العروسين : تقاتلنا وتزاعلنا

تلجة : خلص سيدنا خلص

مختار المخاتير : يعني ما بقا للصلح مطرح

الناس : لا

مختار المخاتير : عال أنا لقيت الحل بما أنه انتو تزاعلتو وما بقى للصلح مطرح وشهيدة  صبية حلوة عم تكبر وانتو مختلفين وبما أني حاكم صالح                 لقيت من المناسب إني أنا إتجوز شهيدة

شهيدة : سيدنا

مختار المخاتير : عارف عارف شو بدك تقولي عوض ما تقولي أنا كبير قولي أصغر من الأعضاء الأختياريي بتهون الشغلة يللا انا رح آخذ شهيدة وانتو اصطفلوا، بتتصالحوا بتتزاعلوا أنا ما دخلني. جمعة الجايي نوّرولي ساحة ميس الريم بدي العرس بميس الريم جايي آخذ عروسي مثل فرسان الكتب وبدي زيون تكون ضيفة الشرف ويني زيون ويني زيون أوعا تخلوها تتحرك من هون مش رح تهرب كحلون. هوبرولي هوبرولي .

– عريسنا … يا زينة كل المخاتير.

 دبكة يا شباب.

 

5 – (غنية : يا مارق ع الطواحين )

 

6 – وقع الحزن بميس الريم :

النسناس : وقع الحزن بميس الريم والعشاق تفرقّوا.

زيون : يا نسناس حامل زينة وعم تقول أشياء حزينة.

النسناس : مرّات الزينة بتحزن.

زيون : إذا هني متفقين بتكونوا غلطانين

النسناس : وقليلة كنت محسبا حزورة، لعبة، تاري فرّقت شخصين بحبوا بعضن.

زيون : وقعتنا كلنا بالظلم

النسناس : دخلك ليش مرّات الواحد بيكون برّات الشغلة بس بحس حاله مجروح.

زيون : أنا هيك ما وقع ظلم عانسان بآخر هالأرض إلا وحسيت حال أنا اللي انظلمت أولك فيي استعمل هالتلفون تأخرت وبيكون بالستي انشغل عليّ شوف  وحياتك.

النساس : ألو ألو شلهوب اعطيني كحلون.

مع لحن

زيون : ألو… كحلون، ستيّ، إشتقتلك يا ستيّ، آيه ما حداً ينطرني لا تأجلوا العرس، يمكن طوّل، وشو هم الفستان، قولي للعروس إنتيّ الزينة وإنتيّ العرس.

 ألو انقطع الخط.

8- رسالة من مختار المخاتير :

رسالة من مختار المخاتير إلى أهل ميس الريم وإلى شهيدة ابنة حاتم أبو شهيدة خطيبته تحية وسلام.

كل تفكيري عندك يا شهيدة وحابب انزل إسهر تحت شباكك لو ما خوفي رشح.

لذلك إنتدبنا عنا حضرة الشاويش النشيط على راس أوركسترا مسلحة ليرقص ويغني تحت شباكك مثل فرسان العصر الرومنطيقي وقد كلفناه.

 

9- أغنية : يا نور حبك

1- (مع لحن)

شهيدة : سلمولي على الحب (4)

وإن مرق واتذكر وان سأل عليي لا تقولولوا صارت ورقة صفرة وطارت مع ريح الشتوية …

نعمان : وان طلب السماح

شهيدة : شو بيفيد السماح والنهاية نهاية واللي راح راح

نعمان : بدي قلك سامحيني آخر مرة سامحيني وبكرا لما بيصير سفر المدينة يبقى ببالي كلمة رضى.

 

3- خبروني يا عصافير الدار : (مع لحن)

أبو العريس : أوف أوف أوف

كنت حبّها كتير وزعلها تيحزنوا عيونها وتصير حبات الدمع تلمع على جفونها.

زيون : وكيف ترجعوا ترضوا

أبو العريس : تصعب علي وروح لعندا وكلمة عتب ترجع تراضينا تمحي الدّني فينا وتمحينا.

زيون : ما زال إيام الزعل هي زمان الحب وانت اللي كنت تحن وتراضي ليش مش نعمان يراضي شهيدة يا أبو نعمان وليش الزمان يمرق على الفاضي.

 

4- حاتم وينك يا حاتم :

راجي : حاتم وينك يا حاتم

حاتم : الله يسامحنا عشرين سنة عداوة غلطتنا بحق حالنا وبحق ولادنا

الشاويش : هيه شو مبين عم تحكوا مع بعضكن

راجي : بدنا نتصالح

الشاويش : شو على خاطركن القضية انتو بدكن تتصالحوا ونحنا ما بدنا نصالح.

راجي : شه، انتو شو دخلكن نحنا بدنا نسقط الدعوى

الشاويش : ونحنا ما بدنا نسقطها

راجي : هي أول مرة بسمعها، السلطة هو الصلح.

الشاويش : إيه صار إلنا مصلحة (2) انكن ما تتراضو ناسيين انتو أنو في حق عام وانه سيدنا مختار المخاتير هو الحق العام وانو الحق العام بده يتجوز شهيده.

راجي : وليش نحنا تحت امره

الشاويش : كيف كيف سمعتني ؟

راجي : بدنا نجوز نعمان وشهيدة

الشاويش : عراف مصلحتك. بنتك بدا تصير كنّة الدولة وأنت رح تصير عمّ الحكم.

حاتم : بس يا خيي الأولاد بحبو بعضن رح يطقو

الشاويش : ويطقوا لكن يطق سيدنا.

راجي : وإذا البنت ما بدا

الشاويش : إيه إذا هيي ما بدا هو بده، الإعضاء بدن نحنا المخفر هون كله بده.

موسيقى

صحايب صحايب صحايب عريسنا مختار المخاتير

مع الموسيقى

يا أفندية بدي العرس يكون منظم

 

5- مدخل العرس (موسيقى)

 

6- زينة عرس وقوالي (موال

مختار المخاتير : أوف أوف أوف

اللازمة : زينة عرس وقوالي ولفتات الريف تاري الحب مخبا لي بميس الريم(2)

راجي : بين الرايح والجايي لعندك ملهوف اختلفوا انت مخباية وصار سحب سيوف (2) ولا تنامي يا حلواية جاييك ضيوف هلق كنتِ مضواية ليش التعتير.

اللازمة

حاتم : صوتك عم بجرحنا ويصب الكاس (يسقينا ويمرجحنا بروض الإحساس2)

اللازمة …

 

7- موال هوي وهيي :

زيون : هوي وهيي اتنينتهون ربيو سوا وعالشبطينة بيناتن تربى الهوا وهب الهوا عحبن بليلة شتي الله ينجينا من هبوب الهوا. عم حلفك بالدمع بليالي الحنين (ردن لبعض)(2) متل ما ربيو سوا.

 

8- زيون كأنك قاعدة بقلبي :

مختار المخاتير : زيون كانك قاعدة بقلبي

مختار المخاتير : وانا جانح المظلومين شو ما قلت قليل علي

جيت وعارف إني جايي ردن لبعضن وعارف إنه ميس الريم ما رح تتصلح إلا إذا هزيناها بقوة قلت رح آخذ شهيدة حتى يتصالحوا ويتراضوا ببعضن؟  ولك روحوا روحوا مش رح تلاقوا مختار متلي .

بسلامة قلبي ألف مرة إذا صار لي شي رح تتشرشحوا …

الناس : تعيش

مختار المخاتير : راجي، حاتم كانت طلعت براس ولادكن. انا بهمز بس                 وينو نعمان اندهولي نعمان، نعمان وينو تعا نعمان تعا لهون. هات إيدك                  لهون هات إيدك   (يضع يد نعمان على يد شهيدة)   الله يهنيكن ويوفقكن ما تخلوني شوفكن إلا مجوزين يللا. يا أهل ميس الريم بما أنه زيون، بما أنه زيون هي اللي حركت القصة إلك عندي جايزة بتقبليا.

زيون : بقبلها

مختار المخاتير : إني أتجوزك

الناس : زيون (بدهشة)

مختار المخاتير : نعمان رح ياخذ شهيدة أنا تعذبت وجيت لازم يطلعلي عروس أنا رح آخذ زيون.

زيون : بس أنا

مختار المخاتير : مخطوبة ؟

زيون : لا

مختار المخاتير : مجوّزة ؟

زيون : لا

مختار المخاتير : عال أنا مش مخطوب اتفقنا

زيون : أنا ما بدي إتجوّز

مختار المخاتير : بهين عليكِ ارجع بلا عروس الحقنا وعذبنا الأعضاء الإختيارية خايف المرة الجاية يكونوا هرهروا.

زيون : سيدنا

مختار المخاتير : نعم

زيون : أولك حقيقة كل اللي عم يصير ؟

مختار المخاتير : ولك ايه ما في حقيقة إلا اللي بتصير

زيون : واللي بالبال ؟

مختار المخاتير : بضلّ بالبال

زيون : وشو قصة الريح بتقدفنا عزوقا ؟

مختار المخاتير : شو قصتك انت الظاهر إلك قصة ؟

زيون : قصتي متل كل القصص

مختار المخاتير : قولي

زيون : بنت بتحلم من صغرها بتحلم والأيام بتمشي والحلم بيتهدى إجاني عريس قالوا مش حلو، إجاني عريس قالوا مش غني والثالث حبيتوا حبيتوا وما بعرف كيف فرقتنا الريح وشفت حالي هون.

مختار المخاتير : يا زيون قصتك انت والريح قصتنا كلنا انا وصلت وانتطرتك بس انت دايما بتتأخري.

زيون : تأخرت عليك

مختار المخاتير : ايه تأخرت دايماً بتتأخري وصلت لعندي متأخرة.

زيون : مش ذنبي

مختار المخاتير : بعرف، هيك بدا الريح

زيون : وانت بتعذر

مختار المخاتير : أنا رح برجع عقصري وبقعد بنطر لحالي وانت بدك تكملي مشوارك عكحلون. يا أهل ميس الريم تتهنوا بالعرس.

زيون : سيدنا

مختار المخاتير : نعم

زيون : خلي نعمان يصلحلي السيارة

مختار المخاتير : تكرمي، اندهوا نعمان يصلحلا السيارة ، بخطركن بخاطركن.

(موسيقى)

زيون : خلص الموسم بكحلون بنت خالتي تجوزت وسبقني الفرح.

النسناس : يسلم عليك نعمان وقال اليوم عرسه مش قادر يصلحلك السيارة

زيون : شو

العسكري : يا با ليه هالسيارة معروضة بالطريق ؟

زيون : صارلا زمان معطلة ما قلتو شي هلق فقتوا ؟

العسكري : كان في شي أهم هلق خلصت المشاكل فضينا للسير ليه معروضة بالطريق ؟

زيون : كل هالمشاكل تّجوزنا نعمان على أمل يصلحا ، ونعمان طلع متل غيرو بس نال

         مطاليبه نسينا   

العسكري : ما بفهم

زيون : خليني فهمك

العسكري : ما بفهم

زيون : قلتلك خليني فهمك

العسكري : ما بفهم قلتلك شو بدك تفهميني تفضلي لهون

زيون : ييه

 

9- غنية : هالسيارة مش عم تمشي

(بلحن العسكري : اسمك، شغلك، ضيعتك ؟

زيون : انا اسمي زيون عندي بالمدينة محل بيع صحون وستي من ضيعة كحلون.

العسكري : الله معك عكحلون